Podyab Ayiti : nan memwa viktim 12 janvye 2010
Podyab Ayiti !
Konbyen rivyè
Pou nou travèse
Konbyen lanmè
Konbyen oseyan
Konbyen bokit dlo
Pou nou jete
Konbyen degouden
Konbyen batanklan
Konbyen tanpèt
Pou nou afwonte
Konbyen kout blòk
Konbyen konplo
Konbyen prezidan
Ki dwe pran palè
Konbyen chèf
Konbyen mafyozo
Podyab Ayiti !
Ayiti... Ayiti... Ayiti...
Konbyen bouji
Pou nou limen
Konbyen sakrifis
Konbyen zèl
Konbyen nanm
Ki pou pran devan
Konbyen bri kouri
Konbyen rèl
Konbyen chantye
Pou nou kreye
Konbyen mato
Konbyen kout pikwa
Konbyen jenerasyon
Ki dwe pase
Konbyen chire pit
Konbyen traka
Podyab Ayiti !
Ayiti... Ayiti... Ayiti...
Konbyen mizik
Ki pou jwe
Konbyen powèm
Konbyen kout tanbou
Konbyen solèy
Ki dwe leve
Konbyen zetwèl
Konbyen moun fou
Konbyen twal
Ki pou chire
Konbyen mazanza
Konbyen manifestasyon
Konbyen doulè
Pou kè w' santi
Konbyen galon san
Konbyen tranbleman
Konbyen...
Podyab Ayiti !
Ayiti... Ayiti... Ayiti...
***nan memwa tout fanmi, zanmi ki pèdi vi yo nan goudougoudou 12 janvye 2010 la...